KLUBI I LIBRIT ‘'AKROPOLI I RI’' 3 (KULTURË) Qendra Kulturore & Filozofike Akropoli i Ri Tiranë organizoi takimin e tretë të Klubit të Librit, si një ofertë për të zbuluar diçka më tepër midis rreshtave dhe faqeve të një libri. Libërdashësit i jepet mundësia të jetojë dhe të ndryshojë në shumë mënyra përmes faqeve të shkruara nga pena të ndryshme. Në këtë takim libri i marrë në studim ishte ‘'Robinson Kruzo'’ nga Daniel Defoe, i cili na rrëfen një aventurë përtej kohërave. Klubi i Librit përfshinte: - Analizën e veprës dhe simbolikave që ajo fsheh në vetvete.  - Shpjegimi i veprës përmes Piramidës së Nevojave nga Abraham Maslow.  - Bisedë e lirë mbi Librin dhe tema të tjera interesante. Vepra e Daniel Defoe na tregon se udhëtimi që Robinson Kruzo bën brenda vetes së tij gjatë kohës që gjendet i humbur në ishull, është një udhëtim që ndërmerr njeriu guximtar, i cili dëshiron të thyej kufinjtë e tij. Secili prej nesh mund të jetë një Robinson Kruzo i kohërave moderne, që humbet brenda vetes së tij dhe e përfundon udhëtimin duke njohur veten e tij. Ju mirëpresim në takime të ardhshme! Qendra Kulturore & Filozofike Akropoli i Ri Postuar me: 2016-06-29 13:23:49

EKSKURSION NË NATYRË (FILOZOFI & KULTURË) Qendra Kulturore & Filozofike Akropoli i Ri Tiranë organizoi në muajin Qershor një Ekskursion Dyditor në Natyrë. Ky organizim është i përvitshëm në Qendrën tonë për shkak të rëndësisë që ka dhe mesazheve që na transmeton. Në këtë aktivitetet përfshiheshin ushtrime të ndryshme me natyrë edukuese, argëtuese dhe bashkëpunuese, mësime praktike, ushtrime psikologjie, vëmendjeje dhe përqëndrimi. Ky aktivitet na rikujtoi edhe një herë tjetër rëndësinë që ka Natyra dhe ritmet e saj në jetën tonë dhe na mundëson që për pak çaste të bëhemi një me të. Ju presim në aktivitetet e radhës Akropoli i Ri Postuar me: 2016-06-27 16:26:39

DHURIMI I GJAKUT PËR FËMIJËT TALASEMIKË (VULLNETARIZËM) Akropoli i Ri Tiranë, në bashkëpunim me Kryqin e Kuq Shqiptar organizoi edhe për një herë tjetër aktivitetin e Dhurimit të Gjakut nën moton “Dhuro gjak, shpëto jetë”. Qendra jonë kryen një dhurim të përvitshëm të gjakut, si një akt i lartë vullnetarizmi. Ky aktivitet kishte si synim ndihmesën e një shtrese delikate në Shqipëri, siç është ajo e fëmijëve talasemikë, por gjithashtu na rikujtoi ndjesinë e bukur e të qënit dhurues. Dhurimi i gjakut ka një rëndësi të madhe si për dhuruesin ashtu edhe për njerëzit në nevojë. Dhuruesi i gjakut nëpërmjet dhurimit rinovon vetveten dhe përmirëson cilësinë e jetës, por njëkohësisht ofron jetë që gjendet brenda gjakut të tij tek ata që kanë nevojë. Vërtetuam edhe një herë me vepra se të ofrosh nuk të varfëron aspak, por të pasuron me vlera në shoqërinë ku bën pjesë. Vullnetarizmi është një sektor që na bën të kuptojmë se sa e bukur dhe e nevojshme është të kemi ndjeshmëri sociale, të mendojmë jashtë egoizmit të vetes tonë si dhe të përpiqemi për një të mirë të përbashkët, të gjithë si një njesi e vetme. Ky aktivitet ishte një shembull dashurie, pasi vetëm dashuria e vërtetë i bën njerëzit të dhurojnë nga jeta e tyre për jetët e shumë talasemikëve që nuk i njohin apo nuk i kanë takuar kurrë më parë. Shprehim mirënjohjen tonë për mjeket dhe infermieret që asistuan në këtë aktivitet, duke ofruar më të mirën e tyre, si edhe për Kryqin e Kuq Shqiptar që na ndihmoi në organizimin e aktivitetit. Ju mirëpresim në aktivitete të tjera. Qendra Kulturore & Filozofike Akropoli i Ri   Postuar me: 2016-06-13 01:27:26